Digital Urdu Ghazal Reader

۱	نہیں عشق میں اس کا تو رنج ہمیں کہ قرار و شکیب ذرا نہ رہا
	غمِ عشق تو اپنا رفیق رہا کوئی اور بلا سے رہا نہ رہا
۲	دیا اپنی خودی کو جو ہم نے اٹھا وہ جو پردہ سا بیچ میں تھا نہ رہا
	رہا پردے میں اب نہ وہ پردہ‌نشیں کوئی دوسرا اس کے سوا نہ رہا
۳	نہ تھی حال کی جب ہمیں اپنے خبر رہے دیکھتے اوروں کے عیب و ہنر
	پڑی اپنی برائیوں پر جو نظر تو نگاہ میں کوئی برا نہ رہا
۴	ترے رخ کے خیال میں کون سے دن اٹھے مجھ پے نہ فتنۂ روزِ جزا
	تری زلف کے دھیان میں کون سی شب مرے سر پہ حجومِ بلا نہ رہا
۵	ہمیں ساغرِ بادہ کے دینے میں اب کرے دیر جو ساقی تو ہائے غضب
	کہ یہ عہدِ نشاط یہ دورِ طرب نہ رہیگا جہاں میں سدا نہ رہا
۶	لگے یوں تو ہزاروں ہی تیرِ ستم تو تڑپتے رہے پڑے خاک پہ ہم
	ولے ناز و کرشمہ کی تیغِ دو‌دم لگی ایسی کہ تسمہ لگا نہ رہا
۷	کئی روز میں آج وہ مہر لقا ہوا میرے جو سمنے جلوہ نما
	مجھے صبر و قرار ذرا نہ رہا اسے پاسِ حجاب و حیا نہ رہا
۸	ترے خنجر و تیغ کی آبِ رواں ہوئی جب کہ سبیلِ ستم‌زدگاں
	گئے کتنے ہی قافلے خشک زباں کوئی تشنۂ آبِ بقا نہ رہا
۹	مجھے صاف بتائے نگار اگر تو یہ پوچھوں میں رو رو کے خونِ جگر
	ملے پائوں سے کس کے ہیں دیدۂ تر کفِ پایہ جو رنگِ حنا نہ رہا
۱۰	ظفر آدمی اس کو نہ جانئیگا وہ جو کیسا ہی صاحبِ فہم و ہنر
	جسے عشق میں یادِ خدا نہ رہی جسے طیش میں خوفِ خدا نہ رہا