Mendele: Yiddish literature and language
______________________________________________________
Contents of Vol. 6.250
March 3, 1997

1) A Yidish-bazukh in England (Dov Noy)

1)----------------------------------------------------
Date: Sun, 2 Mar 1997 11:57:48 +0200 (WET)
From: noy@hum.huji.ac.il
Subject: A Yidish-bazukh in England

Ikh bin geven a sakh mol in England, oykh in Oxford, ober di dozike
bazukhn zenen geven farbundn derikersht mit bibliotekn (bikher,
ksav-yadn) un mit algemeyne folklor-konferentsn. Dos mol iz mayn
tsvey-vokhediker bazukh geshtanen in gantsn unter dem simen fun
yidish, un gekumen tsum oysdruk oyf dray vegn. Bay undz, folkloristn,
iz di draytsol a gor vikhtike, formulistishe tsol. Di dozike dray vegn
zenen geven:

1. Mayn klas in dem Oxford Institute for Yiddish Studies.

2. A bazukh in Helen (Khayale) Beer's onheyber-klas in dem Yarnton Centre
for Hebrew and Jewish Studies.

3. A bazukh bay der A.N. Stencl Yidish kultur-grupe in a shabes-
nokhmitog, in dem Whitechapel Toynbee Hall.

Ad 1: Mayn oybndermonte klas iz bashtanen fun zeks talmidim -
stipendyantn, velkhe zenen gekumen keyn Oxford, kedey tsu shtudirn
yidish "tog un nakht", bemeshekh fun a gants akademish yor (dray
zmanim). Fir fun di zeks studentn zenen gekumen fun Yisroel (tsvey fun
zey zenen oyfgevaksn in gevezenem ratn-farband un hobn farendikt dem
yidish opteyl oyfn hebreishn universitet, vu zey hobn oykh genumen
folklor-kursn), eyne iz gekumen fun Berlin un eyne fun Moskve. Der
nivo fun di studentn, vi oykh zeyer yidish-motivatsye zenen gor hoykh,
un ikh farshtey az zint dem onheyb fun zeyer klas in oktober hobm zey
gemakht groyse fortshritn. Loyt zeyere eygene aroyszogn iz dos adank
zeyere lerers, tsvishn zey - Shimen Abramsky (geshikhte), Genadi
Esteraykh (shprakh), Dov Ber Kerler un Michael Krutikov (literatur).

Mayn "kleynkurs" iz bashtanen fun akht bagegenishn in klas (yede fun
zey - tsvey sho), ober yede sho in klas is geven farbundn mit a
tsvey-dray sho fun heym-arbet. Mayn teme iz geven bagrenetst tsu eynem
fun di finf etnopoetishe zhanern in undzer mizrekh-eyropeisher
folks-literature - der folksproze (mayselekh un legendes, vitsn un
anekdotn), un mir hobn banitst in klas tsendliker fotokopirte zaytlekh
vi opklayb-materialn, tsvishn zey say tekstn gezamlt un farshribn
funem folksmoyl, say teoretishe arbetn (Y.L. Cahan, Dov Sadan), un say
literarishe tekstn velkhe banitsn folksnarative materialn (Shloyme
Bikl Z"L un Yehuda Elberg im tsu lange yor). A sakh tsayt hobn mir
gevidmet dem memorat-zhaner - zikhroynes fun far dem khurbn, velkhe
farmogn folkloristishe elementn. Di mizrekh-galitsishe shtot Kolomey
(mayn geboyrn-, kind- un yugnt-shtot) hot undz gedint vi der
bayshpil-roym, un derfar hobn mir banitst Shloyme Bikl's _A Shtot mit
Yidn_, lider fun Naftoli Gros un Itsik Manger, un oykh (in di
araynfirn tsu di farsheydene narative kategoryes) mayne zikhroynes
velkhe geyen tsurik tsu di 20er un 30er yorn (ikh hob zikh gelernt in
dem zelbikn kheyder un bay dem zelbikn reben vi Shloyme Bikl, nor 20
yor nokh im...). Mir hobn oykh batont di farbindungen tsvishn der
folksproze un andere etnopoetishe zhanern:  Folkslid, shprikhvort (un
vertl), retenish, purimshpil (folksdrame) in dem far-milkhomedikn lebn
un shafn in di yidishe shtet un shtetlekh.

Di letste fun di dray heym-arbetn, velkhe di studentn hobn shriftlekh
tsugeshtelt bemeshekh funem kurs, is geven a bukh-barikht, un di
vayterdike (alfabetishe) reshime fun di 6 analizirte bikher anthalt
say zamlungen fun mindlekhe folks-materialn (Numern 2, 3), say
zikhroynes (1, 5, 6) un say literarishe shafungen (4), un git a bagrif
fun dem filzaytikn farnem funem klas un fun zayne aspiratsyes:

1. Ben-Zvi Bernshteyn, _Zikhroynes un geshtaltn_, London 1962.

2. Yitskhok Even, _Fun der gut-yidisher velt: Mayselekh fun gute yidn_,
New York 1917.

3. M. Lipson, _Di velt dertseylt: Mayses, vertlekh, hanhoges un mides fun
anshey-shem bay yidn_, New York 1928.

4. Yekhiel Shraybman, _Vayter: Roman, dertseylungen, noveln, eseyen,
miniyaturn_, Moskve 1984.

5. Dovid Y. Zilberbush, _Mentshn un gesheenishn: Zikhroynes fun mayn
yugnt-tsayt. Bleter fun mayn pinkes_, Wien 1929.

6. Y. Y. Zinger, _Fun a velt vos iz nishto mer_, New York 1946.

Ikh hof az di studentn veln kontinuirn zeyere yidish-limudim. Tsvey
fun zey hobn shoyn bashtimt di temes fun zeyere doktor-arbetn: 1.
Yidish-sovyetishe "folkslider" vi a propagande-mitl; 2. Khayes in
yidishe dertseylungen un mesholim. Ikh hof oykh as di Yisroel-studentn
veln farblaybn in "Yidishland" fun forshung, unterrikht un sheferisher
oysfirung (eyner fun di studentn iz an aktyor...).


Ad 2: Mayn gevezene shilerin oyf dem yidish-opteyl funem hebreishn
universitet, Helen Beer, hot mikh farbetn baytsuzayn in ir
onheyber-klas (in dem oybndermontn Yarnton Centre) un zikh tsu
bateylikn in a shmues mit ire zeks studentn. Kh'hob ongenumen di
farbetung un bavundert di motivatsye, di ibergegebnkeyt un di
dergreykhn fun di studentn, velkhe shtudirn in Oxford un hobn
oysgeveylt yidish vi a fremdshprakh. Der shmues iz geven fray, di
studentn nokh a por vokhn in klas (zey trefn zikh besakhhakel tsvey
mol a vokh) hobn mikh farshtanen un zikh gekent oysdrikn oyf yidish.
Di zeks studentn in klas zenen gekumen keyn Oxford fun England,
Fareynikte Shtatn, Moldavye, Ungarn un Yisroel (a geboyrene in
Ratnfarband).

Ad 3: Zint dem sof fun der tsveyter velt-milkhome treft zikh yedn
shabes nokhmitog in Whitechapel Toynbee Hall a yidish kultur-grupe,
gegrindet durkh dem poet un redaktor A. N. Stencl. Bishas mayne
bazukhn in England (zint di 50er yorn) hob ikh zikh tomid bamit tsu
farbrengen a shabes nokhmitog mit der grupe, say bishas ANS's lebn un
say nokh zayn toyt. Di goldene keyt fun di "shabes nokhmitogn" tsit
zikh vayter, adank ANS's nokhfolgers un naye teylnemers.

Oykh dos mol bin ikh geven tsu gast bay der grupe. ANS's nokhfolger vi
der onfirer fun der grupe, der shnayder-shrayber-kompozitor, Meir
Bogdanski, iz geven in a rekonvalestsent heym un der younger muziker
Chaim Neslen hot im fartretn. In oylem zenen geven onteylnemers velkhe
gedenken di amolike Stencl-shabosim, tsvishn zey Shloyme Dzikowski,
velkher hot zikh bateylikt in program mit forleyenen un mit zinglider,
Barry Davies (lernt Yidish in London Spiro Institute, un geshikhte in
University of London), velkher hot forgeleyent a por fun Stencl's, un
oykh andere lider. A teyl funem oylem iz geven relativ yung, un di
yungste iz geven take di Berlin-studentke, fun mayn oybendermontn
"kleynkurs"...

Whitechapel iz shoyn yorn lang nit mer keyn tsenter fun yidish-lebn un
fun yidish-shafung. Dos oyle-regl zayn keyn Toynbee Hall yedn shabes
kedey zikh "oyslebn" oyf yidish iz oftmol a gor shvere un komplitsirte
unternemung. Bay yedn fun mayne bazukhn bemeshekh fun di letste yorn
vert di tsol fun di eltere onteylnemers klener, ober di batsiung tsu
Stenclen un zayn zayn yerushe mitsad di vos kumen (un a teyl fun zey
gedenken im nit) iz azoy vi fun khsidim velkhe zenen oyle regl tsu dem
heylikn keyver fun zeyer toytn rebe, vos leybt oyf eybik in zeyere
neshomes.

Ikh ken nit endikn di dozike lange megile, on dem dermonen fun Dr.
Dovid Katz velkher iz der "tate" fun Oxford vi a velt-tsenter fun
yidish. In dem Jewish Chronicle numer, publikirt eyrev mayn tsurikforn
aheym, hot er gelozt visn vegn zayn endgiltikn bashlus tsu farlozn
Oxford. Dos kepl fun der JC korespondents (fun Simon Rocker)
bashtetikt, az "Top Yiddish scholar vacates key Oxford academic
posts". Loyt der doziker korespondents planirt Dr. Katz, velkher voynt
itst in tsofn-Wales, vayter tsu shraybn (dertseylungen, romanen) un
vayter tsu forshn (shprakh, yidish-dialektn in mizrekh-eyrope), un dos
heyst, az laydn fun zayn zuriktsiyen zikh tsu zayne "shleser in der
luft" veln derikersht zayne potentsyele studentn. Oykh di studentn fun
mayn oybndermontn "kleynkurs", velkhe hobn zikh bay im gelernt, zenen
baaynflust un inspirirt gevorn durkh zayne individuele un originele
metodn, zayne breyte horizontn, zayne groyse kentnishn, zayn
perzenlekher filfarbikeyt un zayn pionerishn gayst: Er iz der grinder
fun di Oxford zumer seminarn, fun dem oybndermontn Institute, fun dem
eyntsikn haynttsaytikn literarishn khoydesh-zhurnal oyf yidish - _Di
Pen_ (er vet in gikhn fayern zayn 30stn numer), un nokh un nokh.

Ikh un a sakh fun di fraynd velkhe zenen farbundn, vi ikh, mit
farsheydene aspektn funem "Yidishland", hofn, as dem youngn
(40-yorikn) oysgetseykhntn lerer vet zayn shver on direkte kontaktn
mit studentn, un di "ikh un mayne shikh" tsayt fun zayn sheferishkeyt
vet (nokh zayne 18-khay yor in Oxford) nit doyern tsu lang, un mir
veln ale zoykhe zayn im vider tsu zen, aktiv, sheferish un oyftuerish,
nit nor vi a shrayber un a forsher, nor oykh vi a lerer.

Es bet zikh az dem langn barikht oyf yidish zol bagleytn a vort-
kegn-vort englishe iberzetsung. Dos iz mayn, un nit nor mayn
derfarung, az azelkhe akegngeshtelte tsvey tekstn zenen an
oysgetseykhnter veg tsu bahershn a shprakh (fun eynem fun di paralele
tekstn). Ikh veys oykh az far dem rov fun di "mendelyaner" iz mayn
yidish oftmol tsu shver. Ober ikh veys oykh vi bagrenetst der
mendele-roym iz. Dokh, oyb ir vet farlangen fun mir an englishe
vort-kegn-vort iberzetsung, vel ikh zikh bafrayen zi aykh tsu shikn...

Zayt hartsik gegrist, ir un ayer gantse Mendele-mishpokhe

Dov Noy
______________________________________________________
End of Mendele Vol. 6.250