Morning and Evening Prayer in Latin
Ordo in Matutinis & Vespertinis Latine

This document presents a basic form of Morning and Evening Prayer, according to the usages of the Church of England and the Episcopal Church. It is transcribed principally from: Liber precum publicarum ecclesiae Anglicanae , with material added from other sources. As repetition is a necessary part of language learning, saying one's prayers in the desired language has a wonderful way of achieving such positive reinforcement. This document is offered for those whose Latinity, like mine, can use some additional practice.

SOURCES

Liber precum publicarum ecclesiae Anglicanae / a Gulielmo Bright et Petro Goldsmith Medd -- Ed. altera. -- Londini : Rivington, 1869.

Biblia sacra iuxta Vulgatam versionum / adiuvantibus Bonifatio Fischer ... [et al.] ; rescensuit et brevi apparatu instruxit Robertus Weber ... -- Ed. tertia emendata, ed. minor. -- Stuttgart : Deutsche Bibelgesellschaft, 1984.

Nova vulgata Bibliorum sacrorum editio. -- Libreria Ed. Vaticana, 1986.

The Daily Offices with Hebrew, Greek and Latin supplements / compiled for private recitation by Boyce M. Bennett. -- [New York] : General Theological Seminary, 1977.

Gratia vobis et pax a Deo Patre nostro et Domino Jesu Christo. -- Phil. 1:2

Conplaceant eloquia oris mei et meditatio cordis mei in conspectu tuo semper, Domine adjutor meus et redemptor meus. -- Ps. 19:14

Dominus autem in templo sancto suo: sileat a facie eius omnis terra. -- Hab 2:20

Laetatus sum in his quae dictu sunt mihi in domum Domini ibimus. -- Ps. 122:1

Dirigatur oratio mea sicut incensum in conspectu tuo: elevatio manuum mearum sacrificium vespertinum. -- Ps. 141:2

Tuus est dies et tua est nox, tu fabricatus es auroram et solem; tu facisti omnes terminos terrae, aestatem et ver tu plasmasti ea. -- Ps. 74: 15-16

Benedictam Dominum, qui tribuit mihi intellectum, insuper et usque ad noctem increpuerant me renes mihi. Providebam Dominum in conspectu meo semper; quoniam a dextris est mihi ne commovear. -- Ps. 16: 7-8

DILECTISSIMI fratres, Sacra Scriptura multis in locis nos commonefacit, ut multiplicia peccata nostra et iniquitatem nostram agnoscamus et confiteamur; nec ea in conspectu Dei Omnipotentis, Patris nostri cœlestis, audeamus dissimulare; sed animo demisso, humili, contrito, et obedienti confiteamur; quatenus, per infinitam bonitatem et misericordiam eius, indulgentiam consequamur. Et quanquam in omni tempore peccata nostra coram Deo humiliter agnoscenda sunt, tunc tamen præcipue hoc agendum est cum in publicum cœtum ideo convocati sumus, ut pro magnis ab eo collatis beneficiis gratias referamus, ut eius laudes dignas annuntiemus, et sanctissimum eius Verbum audiamus, et ut quicquid animorum status aut corporis requirit ab eo postulemus. Quapropter vos omnes, qui adestis, rogo et obsecro ut, puro corde, et voce humili, ad thronum gratiæ cœlestis mecum accedatis, ita me præeunte dicentes:

OMNIPOTENS et clementissime Pater; Peccavimus, et a viis tuis erravimus sicut oves quæ perierunt. Inventis et concupiscientiis cordis nostri nimium indulsimus. Sacrosanctas leges tuas violavimus. Quæ facienda erant omisimus: et quæ facienda non erant admisimus; et in nobis nulla est salus. Tu autem, Domine, miserere nostri, miserorum peccatorum. Parce, Deus, peccata confitientibus. Pœnitentes restitue; secundum promissiones tuas humano generi in Christo Jesu Domino nostro declaratas. Propter quem concede, clementissime Pater; Ut posthac pie, juste, sobrieque vivamus, ad gloriam sancti nominis tui. Amen.

OMNIPOTENS Deus, Pater Domini nostri Jesu Christi, qui non vult mortem peccatoris, sed potius ut se ab impietate sua avertat, et vivat; quique Ministris suis potestatem dedit, immo præcepit, ut populo suo pœnitenti Absolutionem Remissionemque peccatorum eorum declarent et pronuntient: Ipse singulis vere pœnitentibus, et sacrosanctum Evangelium suum sincere credentibus, indulgentiam concedit et absolutionem. Quapropter veram pœnitentiam et Spiritum Sanctum eius ab eo postulemus, quo hæc ei complaceant quæ nunc agimus, et vitam reliquam pure sancteque peragamus, et ita tandem ad æterna eius gaudia perveniamus; per Jesus Christum Dominum nostrum. Amen.

Domine, labia nostra aperies.
R. Et os nostrum annuntiabit laudem tuam.
Deus, in adjutorium nostrum intende.
R. Domine, ad adjuvandum nos festina.

Gloria Patri, et Filio, et Spiritui Sancto;
R. Sicut erat in principio, et nunc, et semper: et in sæcula sæculorum. Amen.
Alleluia.
R. Sit Nomen Domini benedictum.

AD MATUTINAS

VENITE, exsultemus Domino : jubilemus Deo salutari nostro.
Præoccupemus faciem eius in confessione : et in psalmis jubilemus ei.
Quonium Deus magnus Dominus : et rex magnus super omnes deos.
Quia in manu eius sunt omnes fines terræ : et altitudines montium ipsius sunt.
Venite adoremus et procidamus et ploremus ante Dominum qui fecit nos;
Quia ipse est Dominus Deus noster :
Et nos populus pascuæ eius, et oves manus eius.
Hodie si vocem eius audieritis, nolite obdurare corda vestra :
Sicut in irritatione : secundum diem tentationis in deserto.
Ubi tentaverunt me patres vestri : probaverunt me, et viderunt opera mea.
Quadraginta annis offensus fui generationi illi : et dixi, Semper hi errant corde.
Et isti non cognoverunt vias meas, ut juravi in ira mea, Si introibunt in requiem meam.
GLORIA Patri &c.

TE DEUM laudamus : te Dominum confitemur.
Te æternum Patrem : omnis terra veneratur.
Tibi omnes Angeli : tibi Cœli et universæ Potestates.
Tibi Cherubin et Seraphin, incessabili voce proclamant:
Sanctus, Sanctus, Sanctus Dominus Deus Sabaoth.
Pleni sunt cœli et terra : majestatis gloriæ tuæ.
Te gloriosus Apostolorum chorus,
Te Prophetarum laudabilis numerus,
Te Martyrum candidatus : laudat exercitus.
Te per orbem terrarum : sancta confitetur Ecclesia.
Patrem immensæ Majestatis.
Venerandum tuum, verum et unicum Filium.
Sanctum quoque Paraclitum Spiritum.
Tu Rex gloriæ, Christe.
Tu Patris sempiternus es Filius.
Tu ad liberandum suscepturus hominem : non horruisti Virginis uterum.
Tu devicto mortis aculeo : aperuisti credentibus regna cœlorum.
Tu ad dexteram Dei sedes : in gloria Patris.
Judex crederis esse venturus.
Te ergo quæsumus, famulis tuis subveni : quos pretioso sanguine redemisti.
Æterna fac cum Sanctis tuis : in gloria numerari.
Salvum fac populum tuum Domine : et benedic hæreditati tuæ.
Et rege eos et extolle illos usque in æternum.
Per singulos dies, benedicimus te.
Et laudamus Nomen tuum in sæculum : et in sæculum sæculi.
Dignare Domine dies isto : sine peccato nos custodire.
Miserere nostri Domine : miserere nostri.
Fiat misericordia tua Domine super nos : quemadmodum speravimus in te.
In te Domine speravi : non confundar in æternum.

BENEDICTUS ES DOMINE, Deus patrem nostrorum :
et laudabilis et superexaltatus in sæcula;
Et benedictum nomen gloriæ tuæ quod est sanctum :
et superlaudabilis et superexaltatum in sæcula;
Benedictus es in templo sancto gloriæ tuæ;
et superlaudabilis et supergloroisus in sæcula;
Benedictus es qui intueris abyssos et sedes super Cherubim;
et laudabilis et superexaltatus in sæcula;
Benedictus es in throno regni tui;
et superlaudabilis et superexaltatus in sæcula;
Benedictus es in firmamento cœli;
et laudabilis et gloroisus in sæcula;
GLORIA Patri &c.

BENEDICITE OMNIA OPERA Domini Domino :
laudate et superexaltate eum in sæcula.
Benedicite Angeli Domini Domino :
laudate et superexaltate eum in sæcula.
Benedicite cœli Domino :
laudate et superexaltate eum in sæcula.
Benedicite aquæ omnes, quæ super cœlos sunt Domino :
laudate et superexaltate eum in sæcula.
Benedicite omnes virtutes Domini Domino :
laudate et superexaltate eum in sæcula.
Benedicite sol et luna Domino :
laudate et superexaltate eum in sæcula.
Benedicite stellæ cœli Domino :
laudate et superexaltate eum in sæcula.
Benedicite omnis imber et ros Domino :
laudate et superexaltate eum in sæcula.
Benedicite omnes spiritus Dei Domino :
laudate et superexaltate eum in sæcula.
Benedicite ignis et æsta Domino :
laudate et superexaltate eum in sæcula.
Benedicite rores et pruina Domino :
laudate et superexaltate eum in sæcula.
Benedicite gelu et frigus Domino :
laudate et superexaltate eum in sæcula.
Benedicite glacies et nives Domino :
laudate et superexaltate eum in sæcula.
Benedicite noctes et dies Domino :
laudate et superexaltate eum in sæcula.
Benedicite lux et tenebræ Domino :
laudate et superexaltate eum in sæcula.
Benedicite fulgura et nubes Domino :
laudate et superexaltate eum in sæcula.
Benedicat terra Dominum :
laudate et superexaltate eum in sæcula.
Benedicite montes et colles Domino :
laudate et superexaltate eum in sæcula.
Benedicite universa germinantia in terra Domino :
laudate et superexaltate eum in sæcula.
Benedicite fontes Domino :
laudate et superexaltate eum in sæcula.
Benedicite maria et flumina Domino :
laudate et superexaltate eum in sæcula.
Benedicite cete et omnia quæ moventur in aquis Domino :
laudate et superexaltate eum in sæcula.
Benedicite omnes volucres cœli Domino :
laudate et superexaltate eum in sæcula.
Benedicite omnes bestiæ et pecora Domino :
laudate et superexaltate eum in sæcula.
Benedicite filii hominum Domino :
laudate et superexaltate eum in sæcula.
Benedicat Israel Dominum:
laudate et superexaltate eum in sæcula.
Benedicite sacerdotes Domini Domino :
laudate et superexaltate eum in sæcula.
Benedicite servi Domini Domino :
laudate et superexaltate eum in sæcula.
Benedicite spiritus et animæ justorum Domino :
laudate et superexaltate eum in sæcula.
Benedicite sancti et humiles corde Domino :
laudate et superexaltate eum in sæcula.
Benedicite, Anania, Azaria, Misael, Domino :
laudate et superexaltate eum in sæcula.
GLORIA Patri &c.

BENEDICTUS Dominus Deus Israel : quia visitavit, et fecit redemptionem plebis suæ;
Et erexit cornu salutis nobis : in domo David pueri sui;
Sicut locutus est per os sanctorum : qui a sæculo sunt, Prophetarum eius ;
Salutem ex inimicis nostris : et de manu omnium qui oderunt eos;
Ad faciendam misericordiam cum patribus nostris : et memorari Testamenti sui sancti;
Jusjurandum quod juravit ad Abraham patrem nostrum : daturum se nobis;
Ut sine timore, de manu inimicorum nostrorum liberati : serviamus illi;
In sanctitate et justitia coram ipso : omnibus diebus nostris.
Et tu, puer, Propheta Altissimi vocaberis : præibis enim ante faciem Domini parare vias eius;
Ad dandam scientiam salutis plebi eius : in remissionem peccatorum eorum.
Per viscera misericordiæ Dei nostri : in quibus visitavit nos Oriens ex alto;
Illuminare his qui in tenebris et in umbra mortis sedent : ad dirigendos pedes nostros in viam pacis.
GLORIA Patri &c.

JUBILATE Deo, omnis terra : servite Domino in lætitia.
Introite in conspectu eius : in exultatione.
Scitote quoniam Dominus ipse est Deus : ipse fecit nos, et non ipsi nos.
Populus eius, et oves pascuæ eius, introite portas eius in confessione : atria eius in hymnis : confitemini illi.
Laudate Nomen eius : quoniam suavis est Dominus : in æternum misericordia eius : et usque in generationem et generationem veritas eius.
GLORIA Patri &c.

ALLELIUA!
Pascha nostrum immolatus est Christus!
Itaque festa celebremus,
non in fermento veteri
neque in fermento malitiae et nequitiae,
sed in azymis sinceritatis et veritatis.
Alleluia!

Christus suscitatus ex mortuis iam non moritur,
mors illi ultra non dominatur.
Quod enim mortuus est, peccato mortuus est semel:
quod autem vivit, vivit Deo.
Ita et vos existimate vos mortuos quidem esse peccato,
viventes autem Deo in Christo Jesu.
Alleluia!

Nunc autem Christus resurrexit a mortuis, primitiae dormientium.
Quoniam enim per hominem mors, et per hominem resurrectio mortuorum:
sicut enim in Adam omnes moriuntur, ita et in Christo omnes vivificabuntur.
Alleluia!

AD VESPERAS

GLORIA in excelsis Deo :
Et in terra pax hominibus bonæ voluntatis.
Laudamus te, benedicimus te :
Adoramus te, glorificamus te.
Gratias agimus tibi propter magnam gloriam tuam, Domine Deus :
Rex cælistis, Deus Pater Omnipotens.
Domine Fili unigenite, Jesu Christe :
Dominus Deus, Agnus Dei, Filius Patris :
Qui tollis peccata mundi, miserere nobis.
Qui tollis peccata mundi, Suscipe deprecationem nostrum.
Qui sedes ad dexteram Patris, miserere nobis.
Quoniam tu solus sanctus, Tu solus Dominus :
Tu solus altissimus, Jesu Christe :
Cum Sancto Spiritu, in gloria Dei Patris.
AMEN.

MAGNIFICAT : anima mea Dominum.
Et exultavit spiritus meus : in Deo salutari meo.
Quia respexit humilitatem ancillæ suæ : ecce enim ex hoc beatam me dicent omnes generationes.
Quia fecit mihi magna qui potens est : et sanctum Nomen eius.
Et misericordia eius a progenie in progenies : timentibus eum.
Fecit potentiam in brachio suo : dispersit superbos mente cordis sui.
Deposuit potentes de sede : et exaltavit humiles.
Exurientes implevit bonis : et divites dimisit inanes.
Suscepit Israel puerum suum : recordatus misericordiæ suæ.
Sicut locutus est ad patres nostros : Abraham et semini eius in sæcula.
GLORIA Patri &c.

CANTATE Domino canticum novum : quia mirabilia fecit.
Salvavit sibi dextera eius : et brachium sanctum eius.
Notum fecit Dominus salutare suum : in conspectu Gentium revelavit justitiam suam.
Recordatus est misericordiæ suæ : et veritatis suæ domui Israel.
Viderunt omnes termini terræ salutare Dei nostri : jubilate Deo, omnis terra ; cantate, exultate, et psallite.
Psallite Domino in cithara, in cithara et voce psalmi : in tubis ductilibus, et voce tubæ corneæ.
Jubilate in conspectu Regis Domini : moveatur mare, et plenitudo eius ; orbis terrarum et qui habitant in eo.
Flumina plaudent manu, simul montes exultabunt a conspectu Domini : quoniam venit judicare terram.
Judicabit orbem terrarum in justitia : et populos in æquitate.
GLORIA Patri &c.

NUNC dimittis servum tuum, Domine : secundum verbum tuum in pace.
Quia viderunt oculi mei : salutare tuum.
Quod parasti : ante faciem omnium populorum.
Lumen ad revelationem Gentium : et gloriam plebis tuæ Israel.
GLORIA Patri &c.

DEUS misereatur nostri, et benedicat nobis : illuminet vultum suum super nos, et misereatur nostri.
Ut cognoscamus in terra viam tuam : in omnibus gentibus salutare tuum.
Confiteantur tibi populi, Deus : confiteantur tibi populi omnes.
Lætentur et exultent gentes : quoniam judicas populos in æquitate, et gentes in terra dirigis.
Confiteantur tibi populi, Deus, confiteantur tibi populi omnes : terra dedit fructum suum.
Benedicat nos Deus, Deus noster ; benedicat nos Deus : et metuant eum omnes fines terræ.
GLORIA Patri &c.

CREDO in Deum, Patrem Omnipotentem, Creatorem cœli et terræ :
Et in Jesum Christum, Filium eius unicum, Dominum nostrum :
Qui conceptus est de Spiritu Sancto,
Natus ex Maria Virgine,
Passus sub Pontio Pilato,
Crucifixus, mortuus, et sepultus :
Descendit ad inferos :
Tertia die resurrexit a mortuis :
Ascendit ad cœlos.
Sedet ad dexteram Dei Patris Omnipotentis :
Inde venturus et judicare vivos et mortuos.
Credo in Spiritum Sanctum,
Sanctam Ecclesiam Catholicam,
Sanctorum Communionem,
Remissionem peccatorum,
Carnis Resurrectionem,
Et vitam æternam.
Amen.

V. Dominus vobiscum.
R. Et cum spiritu tuo.
V. Oremus.

PATER noster, qui es in cœlis,
Sanctificetur Nomen tuum.
Adveniat regnum tuum.
Fiat voluntas tua, Sicut in cœlo, et in terra.
Panem nostrum quotidianum da nobis hodie.
Et dimitte nobis debita nostra, Sicut et nos dimittimus debitoribus nostris.
Et ne nos inducas in tentationem : Sed libera nos a malo.
Quia tua est Regnum, Potentia, et Gloria, in Sæcula sæculorum.
Amen.

V. Ostende nobis, Domine, misericordiam tuam.
R. Et salutare tuum da nobis.
V. Domine, Salvam fac Rem publicam.
R. Et exaudi nos in die qua invocaverimus te.
V. Sacerdotes tui induantur justitiam.
R. Et sancti tui exultent.
V. Salvum fac populum tuum, Domine.
R. Et benedic hæreditati tuæ.
V. Da pacem, Domine, in diebus nostris.
R. Quia non est alius qui pugnet pro nobis, nisi tu, Deus noster.
V. Cor mundum crea in nobis, Deus.
R. Et Spiritum Sanctum tuum ne auferas a nobis.

AD MATUTINAS

DEUS, auctor pacis et amator, quem nosse vivere, cui servire regnare est : Protege ab omnibus impugnationibus supplices tuos ; ut qui in tua defensione confidimus, nullius hostilitatis arma timeamus, per potentiam Jesu Christi Domini nostri. Amen.

DOMINE Sancte, Pater Omnipotens, æterne Deus, qui nos ad principium huius diei pervenire fecisti ; Tua nos hodie salva virtute ; et concede ut in hac die ad nullum declinemus peccatum, nec ullum incurramus periculum ; sed semper ad tuam justitiam faciendam omnis nostra actio tuo moderamine dirigatur; Per Jesum Christum Dominum nostrum. Amen.

AD VESPERAS

DEUS, a quo sancta desideria, recta consilia, et justa sunt opera; Da servis tuis illam quam mundus dare non potest pacem; ut et corda nostra mandatis tuis dedita, et hostium sublata formidine tempora sint tua protectione tranquilla. Per merita Jesu Christi Salvatoris nostri. Amen.

ILLUMINA, quæsumus Domine Deus, tenebras nostras : et totius huius noctis insidias tu a nobis repelle propitius. Propter unicum Filium tuum, Salvatorem nostrum, Jesum Christum. Amen.

DEUS, humani generis Creator et Conservator, supplices te rogamus pro omnibus hominibus cuiuscunque conditionis, ut iis vias tuas, et omnibus gentibus salutare tuum, ostendere digneris. Et præcipue pro bono statu Ecclesiæ Catholicæ ; quam bono Spiritu tuo, quæsumus, ita dirigas et gubernes, ut omnes qui se Christianos profitentur, in viam veritatis ducti, in unitate spiritus, in vinculo pacis, et in justitia vitæ fidem teneant. Postremo paternæ bonitati tuæ omnes illos commendamus qui quovis modo, in mente, corpore, aut rebus, anguntur aut laborant ; [eos præsetim pro quibus orationes nostræ poscuntur,] ut eos, prout variæ eorum requirunt necessitates, consolari et relevare digneris, et fortitudinem in patiendo, et felicem e pressuris exitum concedens. Quod propter Jesum Christum te rogamus. Amen.

OMNIPOTENS Deus, Pater omnium misericordiarum, nos indigni famuli tui humillime et ex animo tibi gratias agimus pro omni bonitate tua et benignitate erga nos et omnes homines : [eos præcipue qui iam volunt tibi confiteri et gratias agere pro misericordia tua nuper in se collata.] Benedicimus tibi pro creatione et conservatione nostra et omnibus huiusce vitæ bonis ; sed maxime pro amore tuo inæstimabili, quo mundum per Dominum nostrum Jesum Christum redemisti ; insuper pro gratiæ instrumentis et spe gloriæ. Quæ omnia beneficia tua da nobis ita, ut justum est, sentire, ut cordibus vere gratis, laudem tuam non loquendo tantum, sed vivendo annuntiemus ; dum servitio tuo penitus devoti, coram te in sanctitate et justitia omnibus diebus vitæ nostræ ambulemus. Per Jesum Christum Dominum nostrum, cui tecum, in unitate Spiritus Sancti, sit omnis honor et gloria, per omnia sæcula sæculorum. Amen.

OMNIPOTENS Deus, qui nobis gratiam dedisti ut hoc tempore concordes te communi supplicatione invocemus ; et duobus vel tribus congregatis in Nomine tuo te quod rogaverint daturum polliceris ; Vota, quæsumus, Domine, et petitiones famulorum tuorum, iam prout illis maxime expediat, prosequere; nobis in hoc sæculo veritatis tuæ cognitionem, et in futuro vitam largiens æternam. Amen.

GRATIA Domini nostri Jesu Christi, et caritas Dei, et communicatio Sancti Spiritus, sit cum omnibus nobis in sæcula sæculorum. Amen. -- 2 Cor. 13:14

DEUS autem spei repleat vos omni gaudio et pace in credendo, ut abundetis in spe in virtute Spiritus Sancti. Amen. -- Rom. 15:13

DEO autem, qui potens est supra omnia facere superabundanter quam petimus aut intellegimus, secundum virtutem, quæ operatur in nobis, gloria in ecclesia et in Christo Jesu in omnes generationes sæculi sæculorum. Amen. -- Eph. 3: 20-21

PAX Dei quæ exsuperat omnem sensum, custodiat corda nostra et intelligentias nostras in scientia et amore Dei, et Filii eius Jesu Christi Domini nostri : Et benedictio Dei Omnipotentis, Patris, Filii, et Spiritus Sancti sit super nos, et maneat semper nobiscum. Amen.